World Health Organisation (WHO) don raise serious concern say the use of tobacco and nicotine products dey increase among children and young people for Africa.

According to WHO, every year over 146,000 people dey die from tobacco-related wahala for African region.

The acting WHO Regional Director for Africa, Dr. Chikwe Ihekweazu, talk this one over the weekend as part of him message to mark World No Tobacco Day.

Him talk say, “Some people dey use strategy to make tobacco look like say na something modern and fine, like say e no get danger. This kind thing dey make children and young people begin smoke early, and e hard to stop once dem start.”

“This year theme na serious warning make we protect our youth from all these harmful tactics wey tobacco companies dey use, wey fit destroy their health and future,” Dr. Ihekweazu talk.

Him still talk say for Africa alone, over 61 million people dey use tobacco, and the one wey dey fear person pass na how pikin between age 13 to 15 don dey join the habit.

“Over 6% of children for that age group don dey use tobacco products. Dem dey fall mugu for the fine design and fake message wey these companies dey promote,” he add.

He warn say young people body never strong finish, and dem brain still dey develop, so e easy for them to become addicted to nicotine.

He talk say the long-term wahala wey dey follow this early use na things like brain problem, lung sickness, heart disease and even cancer. “Once dem start, to stop go be like climbing mountain,” Dr. Ihekweazu talk.

WHO dey beg parents, schools, government and everybody make dem join hand stop this dangerous trend before e spread pass this level.