Gist don land say one woman for Greece wan end her 12-year marriage after ChatGPT allegedly tell am say her husband dey cheat — and na from looking inside him coffee cup!

 

According to tori wey Daily Mail carry from Greek media, the woman — wey be mother of two — no use normal method catch her husband. Instead, she do tasseography (na one kind fortune telling wey dem dey do with coffee grounds), but this time, she no go meet baba or seer — she carry the matter go give AI.

 

She snap her husband coffee cup and upload the picture to ChatGPT, tell am make e “read” the coffee like say e be fortune teller.

 

According to her, ChatGPT yarn say the husband dey think about or don already enter relationship with another woman wey her name start with letter “E”.

 

The woman take the matter serious well-well. She tell her husband to pack out, carry the matter go give lawyer, and even inform their children say divorce dey come.

 

The husband talk for Greek TV show To Proino say the whole thing na “pure nonsense.” E shock am say the wife believe wetin chatbot talk.

 

“My wife dey into astrology before, e don cause small problem for our marriage. But this one pass,” the man talk.

“I laugh am off, but she no gree. Next thing, na lawyer call me.”

 

Even though the man first refuse to separate, within three days, divorce paper don land. Him legal team dey fight the matter now, say ChatGPT no be judge or prophet, and wetin e talk no suppose hold water for court.

 

The strange story don scatter online, especially for Reddit, where people dey laugh say AI don turn native doctor. Others dey worry say people dey trust AI too much, even when e dey talk jaga-jaga.

 

One commenter yarn say, “People go soon forget how to know the difference between real life and AI fiction.”

 

Another person talk say even though AI sabi plenty things, e still dey make mistake and nobody suppose use am take make big life decisions.

 

As the matter be, the only thing clear be say — even coffee no safe again from AI!