Russia don bring new method to tackle their falling birth rate, as government don direct say women weh talk say dem no want born pikin must go for psychological counseling.

 

Under the new guideline from health ministry, doctors weh dey check women reproductive health go dey ask dem how many children dem plan to get. If any woman talk say she no want even one pikin, dem go refer her to medical psychologist.

 

According to the directive, the aim na to help the woman “develop positive mindset” towards having children.

 

This move come as President Vladimir Putin intensify efforts to solve wetin he don describe many times as national emergency.

 

Russia population don dey drop for many years, and the situation don worse because many young men don die or go fight for the Russia-Ukraine war.

 

Even though dem approve the guideline since late February, na recently the matter come gain attention after state media report am.

 

The government don dey treat the population issue as serious survival matter. For 2024, Putin even warn say Russia fit face extinction if birth rate no improve.

 

Right now, the country fertility rate dey around 1.4 children per woman, wey be very low and far from the 2.1 wey experts say country need to maintain steady population.

 

To solve the problem, government don also bring other strong policies like tightening abortion laws, banning “child-free propaganda,” and even giving money and benefits to families weh get many children.

 

But while government say all these steps necessary, critics dey argue say the policies fit interfere too much for people private life and their right to choose whether dem want born pikin or not.