Joy full ground for Enugu State on Thursday as one woman from Ovoko for Igboeze South LGA born five pikin (quintuplets)—and na the same day she and her husband dey celebrate their 5th wedding anniversary.

 

The miracle born happen for St. Patrick’s Hospital, Enugu, where doctors, nurses, family and even strangers gather celebrate the wonder wey happen.

 

Di woman and her husband don marry for five years without any child, and dem don dey pray and wait patiently. But God surprise dem big time—five babies come at once on top the same day dem marry five years ago.

 

One family member talk say, “Na God’s perfect timing be this.” People from Nsukka and Ovoko just dey troop come the hospital dey shout hallelujah and dance for joy.

 

One nurse for the hospital yarn say, “This one pass science, na pure grace. To born five pikin once, and on top wedding anniversary? Na only God fit run am!”

 

Hospital people confirm say the mama and the five babies—three girls and two boys—dey healthy and stable, and dem dey under better care for neonatal ward.

 

Di whole Nsukka side don turn celebration zone. People wey sabi the family don start to gather support and donation to help dem take care of the babies well.

 

Even religious and political leaders for the area don begin send congratulations, say the story na hope and encouragement for other couples wey dey wait for pikin.

 

One pastor wey hear the news talk say, “Delay no be denial. Their testimony na proof say if you wait with faith, God go answer.”