Love Ogah, daughter of Bishop David Oyedepo, don open up about one serious moment from her childhood — when hired k!llers come their house to take her papa life, but somehow no fit see am, even though he dey right there.

She yarn di powerful story during church service as testimony to encourage people make dem build personal relationship with God.

“I still dey for secondary school that time,” she talk. “One night, hired men show for our gate. Dem talk say dem come to execute my papa. Our house just turn to war zone.”

According to her, di attackers search everywhere — up, down, corner, inside room — but still no fit see Bishop Oyedepo.

 

“He just dey watch dem, but dem no see am,” she talk. “We hide behind one door at one point, and the door slam my face — tear my gum, blood full my mouth.”

Fear grip everybody that night. But everything change when her aunt rush in, dey cry and look for Bishop.

 

“Na that time he just waka comot from him room, calm like nothing happen. He tell us, ‘I dey watch dem since. Dem even enter my room, still no see me.’ We no believe our eyes — like film.”

“When you dey inside God’s will, wahala fit come, but you dey covered. I dey beg una — know God for yourself. No be play. You no fit fake am forever. Enemy full ground, but if you dey with God, you dey untouchable. Victory na your portion.”