People for Iyana Agbala, New Ife Road for Ibadan, Oyo State, no fit hide their surprise as dem see former Osun Police PRO, CSP Yemisi Opalola, dey supervise road repair wey she sponsor with her own money.

 

For video wey one of di residents post online, dem show how CSP Opalola dey present live and direct for di scene, dey make sure everything go well for the road wey don bad for years.

 

Some people for the area join her for the work and begin hail her for the good thing wey she do. Dem talk say di road don dey spoil since and e dey give motorists wahala every day.

 

One resident talk say, “Na God go bless this woman. We no expect am at all. Who go believe say na police officer go come repair road for us like this?”

 

Drivers and community people say di road work go bring serious relief, especially during rainy season.

 

People wey sabi Opalola talk say this no be new thing — say even when she dey Osun as Police PRO, she dey always help people quietly and do community work without noise.

 

Na this kind better example dem say we need for service to humanity.