One Nigerian woman of God, Mrs Funmilola Abraham, wey be Regional Overseer for Mountain of Fire and Miracles Ministries, don share her big testimony say God give am twins – one boy, one girl – after 24 years wey she never born pikin.

 

Mama Funmilola talk say she marry on 31 March 2001, but no pikin come. She do fibroid surgery for 2002, husband do medical check – everything fine – but belle still no come. She try “flushing” like 10 times, even do IVF wey give her triplets, but after five months, doctor say the babies get heart wahala and she lose dem. She try another IVF, e no work again.

 

At one point, she tell her husband make he marry another woman like Sarah for Bible, but the man say, “No way, na you I choose, na you I go stay with.” She talk say she just leave everything for God hand and focus on ministry work, even though sometimes she still dey cry for corner.

 

For crossover night 2023 enter 2024, she kneel down dey beg God make she carry Him presence enter new year. Around that time, she pray for one woman wey dey find belle too. The woman later hear of one matron wey dey help women. Mama Funmilola encourage her to go. The woman come pregnant within one month.

 

Later, Mama Funmilola go meet the same matron, take the medicine wey she give (both drink and insert), pray, and sleep with her husband. Within two weeks, she notice say her body don change.

 

On 12 March 2025, God answer her prayer – she born healthy twins. She thank God and her husband for no abandon her, saying, “If God fit do am for me at 58, He fit do am for anybody.”