The waya wey dem carry Comfort Emmanson, one female passenger, go Kirikiri Correctional Centre because she allegedly knack slap and kick Ibom Air cabin crew plus some security people for inside Uyo–Lagos flight on Sunday, don cause serious wahala online.

 

For viral video wey dey fly for internet, people see as Emmanson dey slap and kick airline and airport staff, including one female air hostess, after she no gree off her phone despite say dem don tell am many times before plane go take off.

 

One clip even show as security drag am commot from the plane.

 

For statement wey Ibom Air release, dem talk say the woman almost use fire extinguisher inside plane take attack officials before dem fit hold am.

 

Tunde Moshood, Special Adviser to Minister of Aviation, Festus Keyamo, yarn for him verified X handle say:

 

“Make flying public dey more careful—this unruly passenger for Uyo–Lagos Ibom Air, Miss Comfort Emmanson, don land for court and she dey cool body for Kirikiri now.”

 

But many Nigerians no take am easy. Dem dey talk say na double standard. Dem bring up the matter of Fuji singer Wasiu Ayinde (KWAM 1) wey last week allegedly block ValueJet flight for Abuja and even quarrel with crew, but e no face any prison matter.

 

One user @EmmyPromise71 write:

 

“The level of selective punishment for this country na wa! Some animals dey more equal than others. Naija my country.”

 

@Ronaldnziroma add say:

 

“The Ibom Air girl no block plane, she just fight air hostess, but she dey prison. KWAM 1 assault air hostess and pilot, block plane—which be terrorism—yet he dey house dey enjoy show.”

 

@Yongmayor still drop him own:

 

“KWAM 1 wan stop aircraft for runway, pour alcohol for pilot, nothing happen. KWAM 2 (the woman) no off phone, harass air hostess, dem ban am for life. Na poor man dem dey use law for Naija.”

 

Paul Ibe, one media aide, also talk say:

 

“This assault wey Ms Comfort Emmanson do on Ibom Air crew and security officials na why we suppose serious to stop bad behaviour quick. E good say airport security act sharp remove am from plane and tarmac.”