One young man don cause serious gbege for social media after video show as he waka enter him babe salon to collect all the things wey him don buy for her, including the salon wey him help am open two years ago.

Di matter burst online after one user for X (wey dem dey call Twitter before), @dammiedammie35, post video of the wahala. For the video, the man dey try carry one sterilizer come out from the salon – say na him buy am for the babe when love still dey sweet.

But the babe no gree at all. She stand gidigba, hold ground say the man no go carry anything commot from there. This one cause serious quarrel as both of them dey shout for inside the salon.

Even though the babe dey resist, the guy no still gree. Him talk say as she don cheat am, he must collect back every single thing wey him don give her. Di two begin drag mouth for front of customers and neighbors.

As the video begin trend, many people rush enter comment section to drop their own opinion. Some support the guy say him get right collect wetin him don buy, while others talk say e no make sense to dey disgrace person like that for public.

Wetin you think? Na who you go support for this kind love palava?