Voice of Nigeria (VON) don come out beg Nigerians sake of di gbege wey dem cause when dem post wrong tori say Nigeria don lose give Morocco for di 2025 Women’s Africa Cup of Nations (WAFCON) final. Di yeye news wey dem post for dia website on Saturday night, July 26, talk say Super Falcons don kpai, but na lie—Falcons later turn di match, knack Morocco 3-2, carry di cup for di 10th time.

 

For statement wey VON DG/CEO, Mallam Jibrin Baba Ndace drop on Sunday, him talk say wetin happen na “big mistake” and him thank Nigerians wey send dem talk-talk, vexation and encouragement. Him yarn say VON dey happy join di celebration as Super Falcons make history again.

 

“Voice of Nigeria dey jubilate with Super Falcons as dem no gree fall, dem turn di game, knack Morocco 3–2 for dia own house, and carry di WAFCON trophy for di 10th time,” Ndace talk.

 

Tori reach PRNigeria say dem don already catch di person wey upload di wrong story, and internal investigation dey go on to see wetin go happen to am.

 

But Ndace still talk say dem no go just pour all di blame for one person head—even di sports reporter wey people first think say na him do am—because di wahala show say di system get serious leak.

 

“We no go use one person do scape goat,” Ndace talk. “Dis wahala show say we need better protection and stronger editorial system.”

 

Even though early findings dey show say na internal mistake cause am, Ndace yarn say dem still dey check if hacker hand dey inside. “We dey suspect say hacker fit don enter or person use identity thief waka do wetin dem do. As public organization, we no fit rule out cyber wahala, so we dey set better security for our online platforms.”

 

Sake of di gbege, VON don start new reforms to win back trust and make dem tori correct. Dem don create Investigative Desk, Fact-Checking Unit, and Monitoring and Evaluation Team. Dem even shift some staff position to make everybody sit up.

 

“All dis na to make VON beta again, show transparency, and make di world respect us,” Ndace talk. “We dey stand gidigba for our three pillars: People, Platform, and Partnership.”

 

Ndace end di matter by promise say VON go still dey serve public well and keep journalism clean. “Una voices don remind us say accountability no be wahala—it na foundation of public service. We thank Nigerians wey still dey our side for good time and for time wey we dey correct mistake.”