One herder and at least 12 cows don kpai after thunder strike for Southern Kaduna.

Di incident happen around 4:30 pm on Sunday for Matuak Giwa, Bondon District, Moro’a Chiefdom inside Kaura Local Government Area of Kaduna State.

 

According to di Village Head, Simon Ayuba, di young herder bin dey find shelter from rain wit im cows when thunder strike hit dem, kill dem instantly.

 

“Di herder and 12 cows die for di spot. E pain us well well, di whole community still dey shock,” Ayuba tok.

 

Di Ardo of Bondon District, Mallam Tanko Isiyaka, confirm di matter say di herder na from Bauchi State. E talk say di incident pain dem, and e call for prayers and support for di family wey lose dia pikin.

 

Di community don full with grief as dem mourn di herder wey dem bury according to Islamic rites.