Di new Alaafin of Oyo, Oba Akeem Abimbola Owoade, never start di month-long traditional rites wey go lead to him coronation, ten days after him receive staff of office and certificate of appointment from Governor Seyi Makinde .

For January 13, 2024, Governor Makinde present di staff of office to Owoade for Oyo Governor’s Office, State Secretariat, Ibadan. Makinde talk say di coronation of di new Alaafin go happen in four weeks’ time.

After receiving di certificate and staff of office, Oba Owoade go Oyo town, where him receive triumphant entry from di residents. Him also visit him family house for Oyo town, where family and friends receive am.

But, instead of starting di traditional rites, Oba Owoade jet out to Canada di following day. Him go Canada to officially resign from him workplaces and engagements .

Di Alaafin-elect be Nigerian and Canadian entrepreneur, philanthropist, and President of 100279 Manitoba Limited. Owoade also be Project Coordinator at Manitoba Hydro, one of di largest electric power and natural gas utility providers for Canada.

Di traditional rites wey Oba Owoade suppose start include Ipebi rituals, wey involve several individuals and groups playing key roles in guaranteeing di spiritual well-being and authority of di Alaafin.

Di Oyo State Commissioner for Information and Civic Orientation, Dotun Oyelade, don announce say di state government don approve April 4 as di date for di coronation of di new Alaafin.