National Drug Law Enforcement Agency (NDLEA) don catch Prophet Adefolusho Aanu Olasele, wey people sabi as Abbas Ajakaiye, founder and General Overseer of The Turn of Mercy Church, for allegedly dey arrange multiple drug shipments from Ghana enter Nigeria.

 

Olasele wey don dey run for months, NDLEA nab am on Sunday, August 3, 2025, for him church for Okun Ajah, Lekki, Lagos. NDLEA tokman, Femi Babafemi, say dem wait make Sunday service finish before dem grab am as he dey waka comot church.

 

Babafemi talk say di pastor japa go Ghana for June to dodge arrest after dem link am to two big cannabis seizures — 200kg wey dem recover for Okun Ajah Beach on June 4, and 700kg wey dem find inside him delivery van on July 6. Olasele allegedly confess say na via waterways from Ghana e carry di load.

 

For another operation on Thursday, August 7, NDLEA raid apartment for Parkview Estate, Ikoyi, Lagos, arrest Benjamin Ukoh and recover 32 pouches of Canadian Loud (15.63kg).

 

Across di country, NDLEA seize 3,093kg skunk for Nasarawa, 359kg for Kano, 9kg Colorado along Zaria-Kano road, over 550,000 opioid pills for Gombe, and tramadol, tablets, pentazocine from one bus for Edo State.

 

NDLEA chairman Buba Marwa hail di officers, tell dem make dem continue to balance discipline with efficiency for drug control work.