Former governor of Jigawa State, Sule Lamido, don come out talk say corruption allegations wey former Attorney-General, Abubakar Malami, bin make against am na pure politics, no be truth.

 

For one interview, Lamido tok say im serve Nigeria with clean hand and integrity, adding say wetin dey happen now don show Nigerians “who own wetin” for real. Im come challenge anybody wey wan compare wealth, say make dem leave Nigerians make dem judge by wetin dem dey see.

 

“Na time go tell everything. Nigerians dey watch, and dem sabi who get wetin,” Lamido yarn.

 

Im still use the chance talk say make leaders dey transparent, and warn say many political accusations dey come from personal interest and power play, no be always say na truth.

 

Meanwhile, wahala don still dey ground for Malami side, as Economic and Financial Crimes Commission (EFCC) dey investigate am. The agency don even go Federal High Court for Abuja, dey ask make dem approve final forfeiture of 57 properties wey dem claim say get link with am.

 

But Malami no gree the allegations, as im don describe the whole investigation as “witch-hunt,” insisting say im no do anything wrong.

 

The matter don spark fresh conversation for political space, as Nigerians dey follow the back-and-forth between both men, especially on issues of corruption, transparency, and accountability.