Veteran Nollywood actor, Chiwetalu Agu, don break silence on one fake tori wey dey fly online say him don die. The 66-year-old actor say the rumour na big lie from pit of hell.

 

Di fake news start from one Facebook page wey dem call Mzansi Celebrities, wey post say Chiwetalu Agu die from diabetes and spine surgery complications. Dem even write long emotional message like say na true, come make people begin panic.

 

Di yeye post talk:

 

“Veteran Nollywood Legend Chiwetalu Agu Passes Away at 66! Shocking battle with diabetes & spine surgery ends in tragedy… The nation mourns a true icon lost too soon!”

 

But Oga Agu no take am play at all.

 

He jump go him Instagram page come clear the air. He call the rumour “diabolical” and assure fans say he dey strong, healthy and still get many years to live.

 

“Now make I shock una: I, Chief Chiwetalu Agu of Etiti Amokwe, Enugu State, no go die anytime soon,” he declare with confidence.

 

He even add say instead of him to die, na his enemies go enter grave:

 

“Na who dig pit go fall inside. I never carry my grandchildren. I go carry them in good health when my children ready,” he talk.

 

Chiwetalu Agu still yarn say if na big blog carry that kind fake news, he for don sue dem for defamation, business damage, and cyber harassment. But as he see say na one small blog wey dey hustle for likes, he just leave am.

 

“I wake up see this post. Just for views and comments, one blogger go just kill person wey never die. If na big platform, dem for hear from my lawyer,” he talk.

 

He come end the matter with advice give fans:

 

“Make una no believe everything wey una see online. Anybody wey share that kain fake death news, rebuke am and report the page. I still dey kampe!”