Tori don reach say French police don grab two men wey dem believe follow for the heavy robbery wey happen for Louvre Museum inside Paris, where dem thief royal jewellery wey worth about ₦149.3 billion ($102 million) on Sunday, October 19.

 

According to Le Parisien, the two suspects come from Seine-Saint-Denis, one suburb for Paris side. One of dem even try japa before police hold am for Charles de Gaulle Airport.

 

Dem say na four thieves armed with power tools break enter the museum in broad daylight. The men scatter two strong display glass cases wey dey protect royal ornaments before dem comot with eight precious items wey belong to old queens and empresses of France.

 

For statement wey come from French Ministry of Culture, dem talk say the attack “violent and sharp,” and the alarm for the museum shout immediately.

 

“As e happen, the five workers wey dey duty that time follow correct security procedure — dem call police sharp-sharp and protect all visitors,” the ministry yarn.

 

The things wey dem thief include tiara and necklace from Queen Marie-Amélie and Queen Hortense sapphire collection, emerald necklace and earrings from Marie-Louise own set, one reliquary brooch, and two royal ornaments from Empress Eugénie — one tiara and one big bodice bow.

 

Authorities don join hand with Interpol and insurance people to trace the missing items, wey dem describe as “irreplaceable treasures of French royal history.”

 

After the robbery, soldiers wey carry gun block the whole area, while police do full investigation around the museum. The famous glass pyramid entrance wey everybody sabi for the Louvre side, dem close am small time make dem fit check everywhere.

 

People still dey wonder how thieves fit enter one of the most secure museums for the world without anybody stop dem. The Louvre get plenty CCTV cameras and motion sensors, and e dey host about 30,000 visitors every day.

 

The Louvre Museum self get long history — dem build am in 1546 for King Francis I as royal palace, before e turn museum for 1793 after French Revolution. Today, na the biggest museum for the world, wey cover almost 73,000 square metres — more than ten football fields — and e get over 35,000 artworks, including Leonardo da Vinci’s Mona Lisa.

 

The French Ministry of Culture don talk say dem no go rest until dem catch all the thieves and recover the royal jewels. Dem also promise to tighten security for the museum make this kind gbege no repeat again.

 

Police still dey find the remaining two suspects as investigation continue.