Di Economic and Financial Crimes Commission (EFCC) don declare Christopher Enweremadu, former Abia State Commissioner for Local Government and Chieftaincy Affairs, wanted over heavy allegation of conspiracy, public fund diversion, stealing, and money laundering.

 

For statement wey EFCC Head of Media and Publicity, Dele Oyewale, sign on Wednesday, di agency beg members of di public say make dem help provide any correct info about Enweremadu’s whereabouts. Dem talk say anybody wey sabi where di man dey fit waka go any EFCC zonal office or contact security people.

 

Enweremadu serve under former Governor Okezie Ikpeazu, and EFCC don already dey track am over how money wey suppose enter di 17 local government councils of Abia State between 2019 and 2023 take miss.

 

Na for December 2024, one Federal High Court for Abuja order EFCC to begin deep investigation into di matter after one activist carry ex parte motion come court. Di person talk say billions of naira wey dem allocate for grassroots development vanish during that time.

 

Di court even still order make EFCC seize di international passports of Enweremadu, Erondu Uchenna Erondu (wey be former aide to Ikpeazu), and Deaconess Joy Nwanju, permanent secretary for di ministry, so say dem no go run comot Nigeria.

 

EFCC never release full gist about di transactions wey make dem declare Enweremadu wanted, but di latest action show say di investigation don enter new level.

 

Dis one still follow recent move by EFCC wey dem also declare Abdullahi Bashir Haske, businessman from Adamawa and close person to former Vice President Atiku Abubakar, wanted over similar money laundering and conspiracy mata.

 

As at di time wey we dey write dis report, Enweremadu never talk anything publicly, and nobody sabi where him dey.