Na big gbege don shele as NDLEA don arrest one man wey dem dey call Emami Ajetsibogho aka “Warri Kinsman,” wey be younger broda to former militant and politician, Chief Ayiri Emami. Dem arrest am and some other people after NDLEA officers catch cocaine wey dem hide for lipstick and property papers (C of O) wey dey waka go UK and Saudi Arabia.

 

Femi Babafemi, wey be NDLEA tok-tok pesin, yarn this tori on Sunday. He say na for courier company for Lagos dem catch the package on Thursday, July 3rd, 2025. Inside the package, dem see 84 lipstick wey get 420 grams of cocaine inside, wey dey go UK. Another 280 grams of cocaine dey inside C of O wey dey go Saudi.

 

Dem say dem don dey monitor “Warri Kinsman” for long before dem finally arrest am on Saturday, June 28, for Ikeja, Lagos. Dem even bust him drug network wey get 24 jumbo bags of Canadian Loud (na one strong Igbo strain), wey weigh 414.2kg.

 

Another arrest na one businessman, Ajah Johnson Uchenna, him wife Rosemary, their two daughters – Stella and Ngozi – plus one family friend, Okoro Elijah. DSS first catch the husband and wife on June 13 with 277.5kg of skunk for Ojo area. Dem come hand over dem to NDLEA. As dem still dey custody, NDLEA find out say the daughters and family friend still dey sell drug from house. So, dem raid the house on July 1 and collect another 231kg of skunk. Na so dem arrest Ngozi, Blessing (another daughter), and Okoro Elijah again.

 

For Murtala Muhammed Airport, NDLEA catch one man, Aburemi Hysent, wey dey carry goods go Italy. Inside the package, dem see 7,660 pills of Tramadol 225mg and 200mg, hide inside food items. He talk say dem suppose pay am €800 if e reach Italy.

 

Another time for Lagos airport, dem see 52 travellers’ cheque worth 17.7 million Australian dollars, hide inside children book wey dey go Malaysia. Dem arrest one freight agent, Bolarinwa Saheed. NDLEA talk say dem go hand over the matter to EFCC.

 

Seme border no carry last. On July 5, NDLEA recover 718 big ball of skunk wey weigh 359kg from Baba-Pupa side. For Okene-Lokoja highway, dem catch people wey dey carry 10,000 Tramadol pills and 1.050kg Colorado. Dem later arrest Chinedu Odo, Samuel Ogbonna and Kingsley Ugaji for Jabi Park, Abuja.

 

For Osun State, dem arrest Agunbiade Folusho and Suleiman Dasola with 13,901 pills and injection. Another man, Adebayo Adewale, catch with 48,205 pills of opioid. One vulcanizer shop dem raid for Alekuwodo area, dem collect 1,250 ampoules of pentazocine, 850 Tramadol pills, and 3 bottles of codeine syrup. Dem arrest Wasiu Ajadi, Babatunde Jamiu Ojo and Yusuf Sarafadeen.

 

Osun still hot – NDLEA destroy 24,175kg of skunk wey dem see for 9.67 hectare farm for Ikaka, Oke-Ila forest. Dem arrest 7 people, including Bunmi Adedapo, Adebisi Sodiq, and three bros from Odabe family.

 

For Borno, dem recover 167kg of skunk for Gamboru-Ngala. For Zaria-Kano road, dem seize 452kg skunk and arrest Nasuru Saleh and Mustapha Muhammad.

 

Abuja-Kaduna road, dem catch Sule Ibrahim Sadiq with 11,000 Tramadol pills. For Sokoto, 62-year-old Joseph Onungene dey inside trouble after dem catch am with 4,800 Tramadol pills.

 

For Kebbi, dem burst drug base for Bakin Kasuwa Yauri, collect 312kg skunk and 10,000 Diazepam. For Taraba, dem catch Chigbo Okolo and Ishaku Musa with 49,930 Tramadol capsules.

 

For Edo State, dem arrest wanted man Alaba Monday with 115kg skunk. For another farm, dem catch Shamsu Abdullahi, Peter Egboko and Justin John.

 

Finally, for Cross River, NDLEA arrest one 78-year-old man, Mike Abeng, with 14.49kg skunk and Tramadol. Others wey dem catch include Oyom Akam, Sylvester Odem and Moses Ayo.

 

NDLEA don warn say dem no dey sleep, and say anybody wey wan use Naija as drug route go jam big wahala.